بریتانیا اعلان کړی چې له فرانسې سره یې د سرحدي امنیت په برخه کې یو درې کلن تړون لاسلیک کړی، چې له مخې به یې تر ۶۶۰ میلیونه پونډو (۸۹۲ میلیونه ډالرو) پورې مالي مرسته وکړي، څو د مانش کانال له لارې د ناقانونه کډوالو تګ راتګ راکم کړي.
د راپور له مخې، د دې مرستې یوه برخه به د عملي پایلو پورې تړلې وي، او که ټاکلې موخې پوره نه شي، نو دا مالي مرسته به له یو کال وروسته بنده شي.
رسمي شمېرې ښيي چې په ۲۰۲۵ کال کې شاوخوا ۴۱ زره کسان په کوچنیو کښتيو کې له مانش کانال څخه بریتانیا ته اوښتي، چې دا شمېر د ۲۰۲۲ کال له لوړې کچې سره نږدې دی.
د تړون له مخې، نږدې ۵۰۰ میلیونه پونډه به د فرانسې په شمالي سواحلو کې د امنیت د پیاوړتیا لپاره ولګول شي، او شاوخوا ۱۱۰۰ امنیتي، استخباراتي او پوځي پرسونل به ځای پر ځای شي.
همدارنګه، که نوې تګلارې بریالۍ ثابتې شي، ۱۶۰ میلیونه پونډه اضافي مرسته به هم ورکړل شي، خو که پایلې قناعتبخښونکې نه وي، دا برخه به لغوه شي.
په دې تړون کې د ۵۰ کسیزې شورش ضد ځانګړې پولیسو ډلې جوړول، د استخباراتي او قضايي پولیسو پراختیا، او د سمندري ګزمو زیاتوالی هم شامل دي.
د څارنې لپاره به پرمختللي وسایل لکه بېپیلوټه الوتکې (ډرونونه)، دوه چورلکې او پرمختللي کمرهيي سیستمونه وکارول شي. فرانسې به یو نوی سمندري کښتۍ هم ځای پر ځای کړي او له ۲۰ څخه زیات نور سمندري افسران به وګماري، څو په سمندر کې د کډوالو کښتۍ ودرول شي.
د بریتانیا حکومت وایي، له فرانسې سره ګډو هڅو تر دې دمه له ۴۲ زرو څخه زیات ناقانونه تېرېدونکي کډوال درولي دي.
