رویټرز راپور ورکړی چې د امریکا پوځ په وروستیو اوونیو کې د اوکراین د ډرون ضد ټکنالوژۍ یو سیستم د سعودي عربستان په «شهزاده سلطان» هوايي اډه کې ځای پر ځای کړی دی.
د راپور له مخې، دغه سیستم د اوکراین د «سکای مپ» په نوم د قوماندې او کنټرول یو پلیټفورم دی، چې تر دې مخکې یې په دغه اډه کې د ځای پر ځای کېدو خبره نه وه افشا شوې.
پنځو باخبره سرچینو رویټرز ته ویلي چې د اوکراین پوځي چارواکي په وروستیو اوونیو کې دې اډې ته تللي، څو امریکايي سرتېرو ته د دغه سیستم د کارولو روزنه ورکړي.
د راپور له مخې، «سکای مپ» د اوکراین په پوځ کې د مقابل لوریو بېپیلوټه الوتکو، په ځانګړي ډول د «شاهد» ډوله ډرونونو د پېژندلو او د هغوی د مخنیوي لپاره د قوماندې او رهبرۍ په برخه کې کارول کېږي.
د شاهزاده سلطان هوايي اډه، چې له ایران سره شاوخوا ۶۴۰ کیلومتره واټن لري، د جګړې له پیل راهیسې څو ځله د ډرون او توغندیو د بریدونو هدف ګرځېدلې ده، چې په پایله کې یې الوتکو او ودانیو ته زیان اوښتی او لږ تر لږه یو امریکايي سرتېری هم پکې وژل شوی دی.
د راپور له مخې، شنونکي وایي په دغه اډه کې د اوکرایني ټکنالوژۍ کارول ښيي چې د امریکا د هوايي او توغندیزو دفاعي سیستمونو په برخه کې ځینې تشې او کمزورۍ شته.
راپور زیاتوي چې د اوکراین د څلور کلنې جګړې تجربه له روسیې سره دا سبب شوې چې کییف د ډرون او د ډرون ضد ټکنالوژۍ په برخه کې له ډېرو هېوادونو مخکې شي، او اوس هماغه په جګړه کې ازمویل شوې ټکنالوژي په منځني ختیځ کې کارول کېږي.
