د ملګرو ملتونو د ماشومانو ملاتړ صندوق یا یونیسف په خپل تازه راپور کې خبرداری ورکړی، چې په افغانستان کې ۳.۷ میلیونه د پنځو کلونو کم عمره ماشومان د سختې خوارځواکۍ له خطر سره مخ دي.
یونیسف وايي، دا لومړی ځل دی چې د ماشومانو د خوارځواکۍ کچه د خوړو او تغذیې له ناامنۍ سره یو ځای ارزول کېږي.
د دغه بنسټ په راپور کې، چې «ډېر لږ، ډېر ناوخته؛ په افغانستان کې د کوچنیو ماشومانو د خوړو کړکېچ» نومېږي، ویل شوي چې افغانستان د ماشومانو د شدیدې خوارځواکۍ د زیاتېدو له مهم پړاو سره مخ دی.
راپور زیاتوي چې د ۲۰۲۵ کال په پرتله په ۳۴ ولایتونو کې د ۲۶ ولایتونو د خوارځواکۍ وضعیت خراب شوی دی.
یونیسف وايي، د خوارځواکۍ د زیاتېدو تر څنګ، ناروغۍ، د واکسین ټیټ پوښښ، د پاکو اوبو او روغتیايي خدمتونو کمښت، او د بودجې او تجهیزاتو کمښت هم د ماشومانو وضعیت لا پسې خرابوي.
