وروسته له هغې چې د پاکستان پلوه خبریال جان اڅکزی په یوه ویډیو کې ادعا وکړه، چې “ډېری افغانیت ته د منسوبو کسانو د افغانستان پر خاوره د پاکستان وروستي هوايي بریدونه ستایلي دي“، په ټولنیزو شبکو کې سخت غبرګونونه راپارېدلي دي.
نوموړي په یاده ویډیو کې د احمد مسعود او یونس قانوني نومونه هم یاد کړي او ادعا یې کړې، چې دغو دواړو کسانو د یادو بریدونو ملاتړ کړی دی.
خو یو شمېر افغان لیکوالان او فعالان دا ادعاوې “بېبنسټه او ګمراه کوونکې” بولي. د هغوی په وینا، یاد کسان نور د افغانستان د ولس استازیتوب نه کوي او د افغان ولس دریځ د هغوی له شخصي څرګندونو سره تړل کېدای نه شي.
په دغو غبرګونونو کې ویل شوي، چې د افغانستان پر خاوره د بهرني هېواد هر ډول برید د افغانانو له نظره “جنایت” ګڼل کېږي او هېڅ افغان چې ځان د خپل هېواد وفادار وګڼي، نشي کولای د دا ډول بریدونو ملاتړ وکړي.
منتقدین همداراز ادعا کوي چې پاکستان د خپلو دریځونو د توجیه لپاره د تبلیغاتي ویډیوګانو او مصنوعي محتوا له تولید څخه کار اخلي، خو دا هڅې د افغان ولس پر ملي احساس او واقعیت اغېز نه شي کولای.
د یادونې وړ ده، چې تر اوسه پورې نه احمد مسعود او نه هم یونس قانوني په رسمي ډول د یادو څرګندونو په اړه غبرګون ښودلی دی او موضوع لا هم د بحث او اختلاف په محور بدله پاتې ده.
