په افغانستان کې د امریکا پخوانی سفیر رونالد نیومن وايي، په کابل کې د امریکا د سفارت بیا پرانیستل ممکن دي، خو واشنګټن باید له دې اقدام مخکې له طالبانو څخه د سیاستونو د مشخصو بدلونونو غوښتنه وکړي.
نیومن «آی۲۴ نیوز» ته ویلي، امریکا له طالبانو سره د امریکايي وګړو د خوشې کولو او د ترهګرۍ ضد مبارزې په برخو کې عملي تعامل لري.
هغه زیاته کړې، د ښځو پر وړاندې د محدودیتونو دوام کولی شي په امریکا کې سخت سیاسي غبرګونونه راوپاروي او د واشنګټن او کابل د اړیکو د پراختیا خنډ شي.
د نوموړي په وینا، د افغانستان د کانونو په برخه کې هم د امریکا د اقتصادي تعامل امکان شته، خو پراخې پانګونې د امنیت، قانون حاکمیت او د پانګونو د خوندیتوب تضمین ته اړتیا لري.
نیومن ټینګار کړی، چې د امریکا او افغانستان ترمنځ هر ډول نوی پرمختګ باید په مشخصو اقداماتو او ګام پر ګام تګلارې ولاړ وي.
