د امریکا ولسمشر ډونالډ ټرمپ وايي، پنځه کاله وړاندې په کابل کې د ابي ګېټ په برید کې د ۱۳ امریکايي سرتېرو د وژل کېدو لامل د پخواني ولسمشر جو بایډن له افغانستان څخه د امریکايي ځواکونو ناسم او ګډوډ وتل وو.
ټرمپ دا څرګندونې د ۲۰۲۱ کال د اګست د ۲۶مې د کابل هوايي ډګر د برید د پنځمې کلیزې په مناسبت کړې دي.
نوموړي زیاته کړې، چې د بایډن د ادارې د وتلو پر مهال طالبانو د بګرام له زندانه زرګونه ترهګر او مجرمان خوشې کړي وو.
ټرمپ ویلي، د ۲۰۲۴ کال د ولسمشرۍ د ټاکنیز کمپاین پر مهال یې د ابي ګېټ د برید د قربانیانو له کورنیو سره لیدلي او ژمنه یې کړې وه، چې د پېښې عاملینو ته به عدالت رسول کېږي.
د امریکا ولسمشر وایي، چې د امریکايي سرتېرو د وژنې اصلي طراح یې نیولی او دا کار یې د ولسمشر او اعلی سرقوماندان په توګه له خپلو ستر ویاړونو څخه بللی دی.
ټرمپ د وژل شویو امریکايي سرتېرو کورنیو ته په خطاب کې ویلي چې دوی به هېڅکله هېر نه شي.
په ورته مهال د امریکا د جګړې وزارت د کابل هوايي ډګر د ایبي ګېټ خونړۍ چاودنې د پنځمې کلیزې په مناسبت ویلي، چې له افغانستانه د امریکايي ځواکونو د وتلو څرنګوالی به په پراخو او صادقانه څېړنو کې وارزول شي.
د دغه وزارت ویاند او د ځواکونو د وتلو د ارزونې د ځانګړي پلاوي مشر، شان پرنل، د چهارشنبې په ورځ په یوه ویډیویي پیغام کې ویلي، چې څېړنیزې ډلې تر اوسه داسې معلوماتو ته لاسرسی موندلی چې د دوی له تمې بهر وو.
ایبي ګېټ چاودنه د ۲۰۲۱ کال د اګست په ۲۶مه د کابل هوايي ډګر په دروازه کې وشوه، چې پکې ١٣ امریکایي سرتیري او تر ١٧٠ افغانان ووژل شوه.
