د هند غوره لیګ (IPL) د روان فصل پایلوبه نن ماښام د هند په احمدآباد ښار کې د نریندرا مودي کرکټ لوبغالي کې ترسره کېږي، چې پکې د ګوجرات ټایټنز او رویل چلینجرز بنګلور لوبډلې سره مخامخ کېږي.
ګوجرات ټایټنز د نیمه پایلوبې په مهمه سیالۍ کې د راجستان رویلز پر وړاندې بریا خپله کړه او د پایلوبې ته ورسېده. له بلې خوا، رویل چلینجرز بنګلور د خپلو پیاوړو او دوامدارو لوبو له امله پایلوبې ته لاره وموندله.
د وروستیو پنځو لوبو د احصایو له مخې، رویل چلینجرز بنګلور څلور بریاوې او یوازې یوه ماتې لري، په داسې حال کې چې ګوجرات ټایټنز درې بریاوې او دوه ماتې ثبت کړي دي. دا شمېرې ښيي چې دواړه لوبډلې په ښه فارم کې دي او د پایلوبې سیالي به خورا نږدې او سخته وي.
تمه کېږي، چې نننۍ لوبه به د مینهوالو لپاره یوه په زړه پورې او تاریخي سیالي وي، چې پایله به یې د دې فصل د اتلولۍ برخلیک روښانه کړي.
