په مستعمره پښتونخوا کې د خرابېدونکي امنیتي وضعیت او د امنیتي شخړو د زیاتېدونکو پېښو له امله په پاکستان کې په فدرالي کچه اندېښنې زیاتې شوې دي.
باخبره سرچینې وايي، په ځانګړي ډول د ترهګرۍ پر وړاندې د مبارزې په برخه کې د قانون پلي کوونکو ادارو او امنیتي ځواکونو لپاره د لازم سیاسي او اداري ملاتړ د برابرولو په اړه د صوبايي حکومت پر فعالیت پوښتنې مطرح شوې دي.
سرچینې زیاتوي، چې په پښتونخوا کې روان امنیتي وضعیت، د صوبايي او فدرالي حکومتونو ترمنځ سیاسي اختلافات او د پيټيای په مشرۍ د صوبايي حکومت او مرکزي حکومت ترمنځ مخ په زیاتېدونکې شخړه، د فدرالي چارواکو له مهمو اندېښنو څخه دي.
د سرچینو په وینا، اندېښنې یوازې د عامه نظم او امنیت تر وضعیت پورې محدودې نه دي؛ بلکې د امنیتي ادارو پر وړاندې د سیاسي مخالفت او هغو سیاسي دریځونو په اړه هم بحثونه روان دي، چې د چارواکو په باور، د ترهګرۍ پر وړاندې د مبارزې په حساس پړاو کې د امنیتي ځواکونو پر رول اغېز کولی شي.
د سرچینو په وینا، په همدې شرایطو کې د پيټيای په مشرۍ د پښتونخوا د صوبايي حکومت د راتلونکي په اړه په فدرالي کچه بحثونه چټک شوي دي. ویل کېږي، چې بېلابېل سیاسي او اساسي قانوني انتخابونه تر غور لاندې دي، خو تر اوسه په دې اړه وروستۍ پرېکړه نه ده شوې.
په دې بحثونو کې د پاکستان د اساسي قانون ۲۳۲مه ماده هم یاده شوې ده. دغه ماده د جګړې، بهرني یرغل یا داسې داخلي ګډوډۍ په صورت کې د بېړني حالت د اعلان زمینه برابروي، چې د یوه صوبايي حکومت له کنټرول څخه بهر وي او د هېواد یا د هغې یوې برخې امنیت ته ګواښ متوجه کړي.
همداراز، د اساسي قانون ۲۳۴مه ماده د هغه حالت لپاره ځانګړې ده، چې د یوه صوبې حکومت د اساسي قانون له مخې ونه شي چلول کېدای.
سرچینې وايي، راتلونکې څو ورځې به د مستعمرې پښتونخوا د وضعیت او په ځانګړي ډول د پيټيای له خوا د اکتوبر پر ۴مه د اعلان شوي سیاسي پروګرام له څرنګوالي سره د فدرالي حکومت د احتمالي غبرګون په ټاکلو کې مهمې وي.
په ورته وخت کې، پاکستاني چارواکي اندېښنه لري، چې دوامدار سیاسي احتجاجونه، د دولتي ادارو پر وړاندې مخالفت او سخت سیاسي بیانونه ښايي په یوه له مخکې نازک امنیتي چاپېریال کې وضعیت لا پېچلی کړي.
د سرچینو په وینا، په مستعمره پښتونخوا کې د امنیتي ستونزو له امله عام خلک هم له جدي ستونزو سره مخ دي.
سرچینې ټینګار کوي، چې وضعیت لا هم بدلېدونکی دی او راتلونکې ورځې به روښانه کړي، چې ایا د صوبايي او فدرالي حکومتونو ترمنځ سیاسي کړکېچ راکمېږي، که مرکزي حکومت له هغو اساسي قانوني انتخابونو څخه د یوه د عملي کولو پر لور ځي چې اوس تر بحث لاندې دي.
