د امریکا د عدلیې وزارت د ولسمشر ډونالډ ټرمپ د خبري پوښښ د ځنډولو له امله د پنځو مشهورو امریکايي ټلوېزیوني شبکو، اېبيسي، سيبياېس، سياېناېن، اېنبيسي او فاکس نیوز، پر ضد د څېړنو د پیل خبر ورکړی دی.
د امریکا د عدلیې وزارت ویاندې ایملي کانویګټن، د شنبې په ورځ ویلي، چې دغه وزارت څېړي، ایا یادو رسنیو د ولسمشر ټرمپ د خبري پوښښ د ګډ ځنډولو له امله د فدرالي انحصار ضد قوانینو سرغړونه کړې ده که نه.
نوموړې ویلي، د سوداګریزو سیالانو ترمنځ ګډ بایکاټ کولای شي د امریکا د شرمن قانون نقض کړي. هغې زیاته کړې، چې د عدلیې وزارت د انحصار ضد څانګه یوازې د دې معلومولو لپاره څېړنې کوي، چې ایا یادو رسنیو د انحصار ضد قوانین تر پښو لاندې کړي دي که نه.
دا څېړنې د ټرمپ د ادارې او د امریکا د لویو رسنیو ترمنځ د روانو اختلافونو په لړ کې ترسره کېږي. ټرمپ څو ځله اصلي رسنۍ په جعلي خبرونو تورنې کړې او له خبریالانو سره یې د مطبوعاتي غونډو پر مهال لفظي شخړې کړې دي.
د راپورونو له مخې، د امریکا د پنځو ټلوېزیوني شبکو خبریالانو تېره میاشت وروسته له هغه د ولسمشر خبري پوښښ وځنډاوه، چې سپینې ماڼۍ د سياېناېن، اېماېس ناو او پولیټیکو د خبریالانو د سپینې ماڼۍ د خبري پوښښ اسناد لغوه کړل.
سپینې ماڼۍ د سپټمبر په ۱۹مه ویلي وو، چې د ولسمشر پوښښ امتیاز دی، نه حق. دغو رسنیو وروسته د ټرمپ د ادارې پر ضد دعوه ثبت کړه او ویې ویل، چې د خبریالانو له خبري پوښښ څخه محرومول د امریکا د اساسي قانون د لومړي تعدیل خلاف عمل دی او د سپینې ماڼۍ د غچ اخیستنې څرګندونه کوي.
سياېناېن د هغو پنځو رسنیو له ډلې ده، چې له اېبيسي، سيبياېس، اېنبيسي او فاکس نیوز سره یوځای د سپینې ماڼۍ د ټلوېزیوني خبري پوښښ اصلي ډله جوړوي. دغه رسنۍ په ګډه د ولسمشر د رسمي سفرونو او نورو مراسمو ویډیويي راپورونه چمتو کوي او له نورو رسنیو سره یې شریکوي.
د سپینې ماڼۍ د پرېکړې په غبرګون کې ټولو پنځو ټلوېزیوني شبکو، د فاکس نیوز په ګډون، د ولسمشر خبري پوښښ وځنډاوه او د بدیل پوښښ له برابرولو یې هم ډډه وکړه.
سپینې ماڼۍ د سپټمبر په ۲۴مه، وروسته له هغه د خبریالانو اسناد بېرته فعال کړل، چې د امریکا فدرالي قاضي، تیموتي کېلي، د لاسرسي بندیز احتمالي غیرقانوني وباله او ادارې ته یې امر وکړ، چې د خبریالانو لاسرسی سمدستي بېرته ورغوي.
خو له دې سره سره، د ولسمشر په ځانګړو مراسمو کې د خبریالانو د ګډون او د خبري پوښښ د دندو پر سر اختلافونه دوام لري.
د خبریالانو د خوندیتوب کمېټې د امریکا د څانګې مشر، جوز زامورا، د شنبې په ورځ د رسنیو پر ضد د څېړنو پر پرېکړې نیوکه وکړه.
هغه پر اېکس ټولنیزې شبکې لیکلي، چې حکومت باید د مطبوعاتي لاسرسي د دفاع کوونکو رسنیو د وېرولو لپاره د انحصار ضد څېړنو څخه ګټه وانخلي.
زامورا زیاته کړې، چې معلوماتو ته د خلکو د لاسرسي حق د خبریالانو له لاسرسي سره تړلی دی.
