د بښنې نړۍوال سازمان ویلي، چې د کابل د امید د روږدو کسانو د درملنې پر مرکز د پاکستان هوايي برید باید د احتمالي جګړهییز جرم په توګه وڅېړل شي.
دغه سازمان په خپله نوې څېړنه کې ویلي، چې د پاکستان د پوځ هغه ادعا د تأیید لپاره یې هېڅ کره نښه نه ده موندلې چې ګواکې د امید مرکز د وسلو، مهماتو د ساتلو یا نورو پوځي موخو لپاره کارول کېده.
د بښنې نړۍوال سازمان ویلي، چې پر دغه روغتیايي مرکز برید د ناروغانو او روغتیايي ځایونو د خوندیتوب اصول، د ملکي او پوځي موخو د بېلوالي اصل او د برید د پام او اندازې اصول تر پښو لاندې کړي دي.
د دغه سازمان د سوېلي اسیا د برخې مشرې ویلي، چې د امید مرکز برید د نړۍوال بشري قانون جدي سرغړونه بلل کېدای شي او ښايي د جګړهییز جرم تر کچې ورسېږي.
هغې له پاکستاني چارواکو غوښتي، چې د پېښې په اړه بېړنۍ، روڼې، بشپړې، خپلواکې او بېپلوي پلټنې ترسره کړي، پایلې یې له خلکو سره شریکې کړي او که د سرغړونې کافي شواهد وموندل شي، مسؤلان دې قانوني چلند سره مخ شي.
د ملګرو ملتونو مرستندوی پلاوي یا یوناما ویلي، چې د روان کال له جنورۍ تر مارچ پورې په افغانستان کې د طالبانو او پاکستان ترمنځ د نښتو له امله له ۷۵۰ ډېر ملکي کسان شهیدان شوي او ټپیان شوي دي. د دغه پلاوي د معلوماتو له مخې، په دې موده کې ۳۷۲ کسان شهیدان شوي او ۳۹۲ نور ټپیان شوي دي.
دغه پلاوي ویلي، چې یوازې د امید مرکز په برید کې ۲۶۹ ملکي کسان وژل شوي، خو طالبانو او ځینو نورو بنسټونو د وژل شویو کسانو شمېر شاوخوا ۴۰۰ تنه ښودلی دی.
د بښنې نړۍوال سازمان ویلي، چې د خپلې څېړنې لپاره یې له ۶۰ ډېر انځورونه او ویډیوګانې، له ۳۰ ډېر د سپوږمکۍ انځورونه او د امید مرکز او د ابنسینا روغتون له اوسنیو او پخوانیو کارکوونکو سره خبرې ارزولي دي.
د دغه سازمان په وینا، برید د شپې شاوخوا نهه بجې شوی، هغه مهال چې د روژې تراویح پای ته رسېدلې وې. د مرکز ځینو کارکوونکو ویلي، چې د برید پر مهال په دغه ځای کې له زرو ډېر ناروغان ساتل کېدل.
د بښنې نړۍوال سازمان ویلي، چې د جولای په نهمه یې د پاکستان له بهرنیو چارو وزارت څخه د برید په اړه د معلوماتو غوښتنه کړې، خو تر اوسه یې ځواب نه دی ترلاسه کړی.
پاکستان تر اوسه د دغه راپور په اړه رسمي څرګندونې نه دي کړې.
دا په داسې حال کې ده، چې په کابل کې د امید پر روږدو درمنلې روغتیایي مرکز د برید وروسته پاکستان د افغانستان پر خاوره څو ځله تېری کړی او په افغان خاوره کې یې د ملکي بې ګناه وګړو کورونه په نښه کړي، چې له امله یې لسګونه کسان شهیدان او ټپیان شوي دي.
