افغان خبریال سمیع یوسفزی وایي، کله چې په ۲۰۲۱ کال کې امریکا، ناټو او د افغانستان پخوانی حکومت له هېواده ووتل، طالبانو داسې انګېرله چې پوځي بریا به د تل لپاره د دوی سیاسي واکمني تضمین کړي. خو د یوه هېواد اداره کول د جګړې له ګټلو سره ډېر توپیر لري.
د یوسفزی په وینا، وروستیو کړکېچونو او د پاکستان د پوځي فشار پر وړاندې د طالبانو کمزوري غبرګون وښودله، چې د دوی د ځواک د تصور تر شا ژورې نیمګړتیاوې شته. هغه انځور چې طالبان یې د خپل ځواک او برلاسۍ په اړه وړاندې کول، اوس د پخوا په څېر پیاوړی نه ښکاري.
یوسفزی زیاتوي، که څه هم طالبان لا هم په افغانستان کې واک لري، خو یوازې واکمن پاتې کېدل د مشروعیت معنا نه لري. سره له دې چې تر اوسه کومه قوي او متحده بدیله ډله نه ده رامنځته شوې، همدغه سیاسي تشه د طالبانو د دوام یو مهم لامل ګرځېدلې ده.
د یوسفزي په خبره، تاریخ ښودلې چې د وسلهوالو ډلو پوځي بریا تل د اغېزمن او بریالي حکومت تضمین نه شي کېدای. تر هغو چې ټولشموله سیاست، اقتصادي رغونه، بنسټیز بشري حقونه او رښتینې ډیپلوماسي رامنځته نه شي، نړیواله انزوا به زیاته شي او کورني فشارونه به هم ورځ تر بلې ډېر شي.
یوسفزی وایي، افغانان سولې، کار، زدهکړو او حسابورکوونکي مشرتابه ته اړتیا لري؛ نه له ګاونډیو هېوادونو سره دوامدارو کړکېچونو او د هېواد د راتلونکي په اړه لا زیاتې بېباورۍ ته.
