د تاجکستان ولسمشر امام علي رحمان او د ډلهییز امنیت تړون سازمان (CSTO) عمومي منشي طالقبیک ماسادکوف په دوشنبه کې د یوې لیدنې پر مهال د افغانستان د امنیتي وضعیت او د تاجکستان–افغانستان د پولې د پیاوړتیا په اړه خبرې کړې دي.
په دې لیدنه کې دواړو لورو د پولو د امنیت د ښه کولو لپاره د دغه سازمان د ګډ پروګرام پر عملي کېدو ټینګار کړی او هغه یې د منځنۍ آسیا د ثبات لپاره «حیاتي» بللی دی.
ماسادکوف ویلي، چې اوس مهال د دې پروګرام لومړی پړاو روان دی، چې پکې د پولو د امنیتي تجهیزاتو او وسلو د لېست او ویش په اړه د غړو هېوادونو ترمنځ همغږي رامنځته کېږي.
دواړو لورو یو ځل بیا ټینګار کړی ،چې د افغانستان له شمالي سیمو د احتمالي ګواښونو له امله د پولې امنیت پیاوړتیا د سیمې لپاره مهمه اړتیا ده.
