د پاکستان دفاع وزیر خواجه اصف وايي، پر سعودي عربستان د یمن د حوثیانو وروستي بریدونه ښايي د پاکستان، سعودي عربستان او ترکیې ترمنځ د ګډې دفاعي هوکړې د عملي کېدو لامل شي.
خواجه اصف ویلي، د دغې هوکړې له مخې که د درېیو غړو له ډلې پر یوه هېواد برید وشي، هغه د ټولو غړو پر وړاندې برید ګڼل کېږي او پاکستان د هوکړې له مخې د سعودي عربستان د دفاع په برخه کې د مرستې مکلفیت لري.
د پاکستان د دفاع وزیر دا څرګندونې وروسته له هغې کړې، چې د سپټمبر پر اتمه د یمن حوثیانو د سعودي عربستان پر جنوبي سیمو پراخ توغندیز او بېپیلوټه بریدونه وکړل. د راپورونو له مخې، په دغو بریدونو کې د ابها، نجران، جیزان او خمیس مشیط سیمې په نښه شوې دي او ۷۳ کسان ټپیان شوي دي. د سعودي عربستان پر ځینو انرژۍ او پوځي تاسیساتو هم د بریدونو راپور ورکړل شوی دی.
پاکستان، سعودي عربستان او ترکیې د مکې ګډې دفاعي هوکړې په نوم دفاعي تړون د ۲۰۲۶ کال د اګست پر اوومه په مکه مکرمه کې لاسلیک کړ. د هوکړې موخه د درېیو هېوادونو ترمنځ د دفاعي او امنیتي همکاریو پیاوړتیا او د ګډو ګواښونو پر وړاندې د همغږۍ رامنځته کول دي.
د هوکړې له مخې، د یوه غړي هېواد پر وړاندې د تهاجمي اقدام موضوع د نورو غړو د امنیت له موضوع سره تړل کېږي.
تر دې مخکې د درېیو هېوادونو چارواکو د اګست په ۳۱مه په لومړۍ ګډه غونډه کې د هوکړې د عملي کولو لپاره د همغږۍ، دایمي سکرتریت او د راتلونکو اقداماتو پر نقشې هم خبرې کړې وې.
