د روسیې د بهرنیو چارو وزارت اعلان کړی، چې یو المانی دیپلومات یې له هېواده ایستلی دی. دا اقدام وروسته له هغه شوی چې برلین د یوه روسي دیپلومات پر وړاندې «دښمنانه اقدام» ترسره کړ.
د روسیې د بهرنیو چارو وزارت په یوه خبرپاڼه کې ویلي، دغه پرېکړه د متقابل عمل پر اصل ولاړه ده او مسکو نه شي کولای د خپلو ډیپلوماتانو پر وړاندې د المان اقدامات بېځوابه پرېږدي. وزارت ټینګار کړی، چې د روسیې او المان ترمنځ د ډیپلوماتیکو اړیکو د خرابېدو مسوولیت د برلین پر غاړه دی.
تر اوسه د المان حکومت په رسمي ډول د روسیې د دې پرېکړې په اړه تفصیلي غبرګون نه دی ښودلی.
د اوکراین او روسیې د جګړې له پیل وروسته، د روسیې او لوېدیځو هېوادونو، په ځانګړي ډول د اروپايي اتحادیې د غړو هېوادونو ترمنځ، ډیپلوماتیکې اړیکې په پرلهپسې ډول ترینګلې شوې دي. په دې موده کې، روسیې او ګڼو اروپايي هېوادونو څو څو ځله یو د بل ډیپلوماتان شړلي دي، چې دا کار عموماً د «متقابل اقدام» په چوکاټ کې ترسره شوی.
کارپوهان وایي، د ډیپلوماتانو ایستل که څه هم د اړیکو بشپړ پرې کېدل نه دي، خو دا د دواړو لورو ترمنځ د ژور سیاسي بېباورۍ نښه بلل کېږي او کولی شي پر راتلونکو سیاسي او امنیتي خبرو منفي اغېز ولري.
