د طالبانو حکومت د عدلیې وزارت وايي، د دوی تقنیني اسناد په بشپړ ډول د اسلامي شریعت مطابق جوړ شوي. په وینا، یې پر اسلامي قوانینو نیوکه، پر اسلامي شریعت نیوکه ده.
د طالبانو حکومت د عدلیې وزارت په یوه اعلامیه کې ویلي، د دوی تقنيني اسناد د افغانستان د جیدو علماوو د ګڼو هیئتونو لخوا د هر وزارت او اړوندې ادارې، د عدلیې وزارت، سترې محکمې او د حکومت مشر د دفتر په کچه د الله تعالی د کتاب، د رسول الله صلی الله علیه وسلم د سنتو او د حنفي فقهې د مستندو کتابونو پر بنسټ تدوین او تخریج کېږي.
عدلیې وزارت وايي، د طالبانو پر تقنيني اسنادو نیوکې او اعتراضونه شرعي او علمي بنسټ نه لري بلکې د جهل او ناپوهۍ لهمخې تر سره کېږي.
یا وزارت ویلي، چې پر دغو قوانینو اعتراض کوونکي کسان به عدلي او قضايي ادارو ته ور وپېژندل شي.
